Guayama San Pedro ayllullaktapia runa kawsaykunamanta taripana; kay yachaykunawan " Jatari Unancha" hatun yachanawasipi chunkaniki kallari yachay tachakukkuman yachachina.

Abstract

Ñawpa watakunapika kunan Guayama San Pedro ayllullakta allpaka shuk amu Álvarez nishka shutipakmi kashka nin. Pay amuka kimsa haciendatami charishka, kaykuna: Machay, Latacunga, Guayama, shinallatak paykuna ayllupura amu Toledo shutipash kimsa haciendatami charishka, kaykuna: Munchipamba, Salache, Chaupi. Kipa watakunapika Álvarez, Toledo amukunaka Francisco Estupiñán amuman katunakushka. Rantik amuka tantachishpaka sukta haciendatami charishka, kaykuna: Machay, Latacunga, Guayama, Munchipamba, Salache, Chaupi. Francisco Estupiñán amuka tawka watakunata sapalla wamra kawsashka kipami Adela León kuytsawan sawarishka. Paykunaka: Cristina Estupiñán León, Piedad Estupiñán León, Olga Francisca Estupiñán León, wawakunatami charinakushka. Francisco Estupiñán ña ruku tayta kashpaka tukuy paypa charishkakunata kimsa wawaman rakishka. Chaypimi Guayama haciendataka chawpipi rakishpa Piedad Estupiñán León, paypa kusa Cristóbal Cepeda, Olga Francisca Estupiñán León, paypa kusa Gonzalo Alarcón, wawakunaman kushka.